თინეიჯერული დრამები, სადაც მთავარი გმირები სიმპათიური სპორტსმენი ბიჭი და ჭკვიანი, თუმცა ნაკლებად პოპულარული გოგოა, დიდი ხანია სატელევიზიო კლიშედ იქცა. თუმცა ბოლო წლებში ამ ჟანრმა ახალი სიცოცხლე შეიძინა.
სტრიმინგ პლატფორმებზე ერთმანეთის მიყოლებით ჩნდება სერიალები, რომლებიც რომანტიკული ურთიერთობების ძველ სტანდარტებს ანგრევს და მაყურებელს ე.წ. „ქალების მიერ დაწერილ კაცებს“ აცნობს, გმირებს, რომლებიც მხოლოდ გარეგნობით კი არა, ემოციური ინტელექტითაც გამოირჩევიან.
ყველაფერი მიმდინარე წლის დასაწყისში კანადური სერიალით Heated Rivalry დაიწყო. გამოსვლისთანავე პროექტმა მისი ვარსკვლავები, ჰადსონ უილიამსი და კონორ სტორი, საერთაშორისო პოპულარობის ცენტრში მოაქცია.
ახლა კი მთელი მსოფლიოს ყურადღება Amazon Prime-ის ახალ ჰიტზე, Off Campus-ზეა მიმართული.
სერიალი კანადელი მწერლის, ელ კენედის ბესტსელერებს ეფუძნება. პრემიერიდან სულ რამდენიმე დღეში შოუ Prime Video-ს გლობალური რეიტინგების სათავეში მოექცა, ხოლო 12 დღეში 36 მილიონი მაყურებელი დააგროვა.
წლების განმავლობაში სპორტული დრამები ხშირად ეგოისტი და ემოციურად მიუწვდომელი ათლეტების ირგვლივ ვითარდებოდა, თუმცა Off Campus ამ სტერეოტიპს მთლიანად არღვევს. მთავარი გმირები, გარეტ გრემი (ბელმონტ კამელი), დინ დი ლორენტისი (სტივენ კეილინი) და ჯონ ლოგანი (ანტონიო ჩიპრიანო) ძალიან შორს არიან იმ ტოქსიკური პერსონაჟებისგან, რომლებსაც ეკრანზე მიჩვეულები ვართ.
მიუხედავად იმისა, რომ სერიალში გვხვდება ტერმინი puck bunny, რაც დამცინავი ტერმინია იმ ქალების მიმართ, რომლებიც ჰოკეიზე მეტად თავად მოთამაშეებით ინტერესდებიან, სიუჟეტი ურთიერთპატივისცემასა და ჯანსაღ ურთიერთობებზეა აგებული. ბიჭი პერსონაჟები ამბიციურები, მზრუნველები და ყურადღებიანები არიან. სწორედ ამიტომ მოიპოვა სერიალმა მაყურებლის განსაკუთრებული სიყვარული.
პირველი სეზონი ელ კენედის ორი წიგნის, The Deal-ისა და The Score-ის მიხედვითაა შექმნილი. სიუჟეტის მთავარი ხაზი ჰანა უელსს (ელა ბრაიტი) მიჰყვება, რომელიც სკოლის წლებში გადატანილი სექსუალური ძალადობის ტრავმას უმკლავდება. ჰანასა და გარეტის ურთიერთობა კი თანამედროვე, ჯანსაღი ურთიერთობის ერთ-ერთ საუკეთესო სატელევიზიო მაგალითად იქცა, განსაკუთრებით იმის გამო, თუ რამდენად ფრთხილად და პატივისცემით ეკიდება გარეტი ჰანას საზღვრებსა და შიშებს.
ერთი შეხედვით, Off Campus-ს ნაცნობი სიუჟეტი აქვს: მუსიკოსი ჰანა ჰოკეის გუნდის კაპიტან გარეტს ფილოსოფიის გამოცდისთვის მომზადებაში ეხმარება, რათა მან სპორტული სტიპენდია არ დაკარგოს. სანაცვლოდ, გარეტი ჰანას იმ ბიჭის ყურადღების მიქცევაში ეხმარება, რომელიც დიდი ხანია მოსწონს. თუმცა სერიალი ამ მარტივ სიუჟეტურ ჩარჩოს მალევე სცდება. აქ არ არის ხელოვნურად გაწელილი გაუგებრობები და დამღლელი დრამა.
ალბათ სწორედ ამიტომ იქცა Off Campus ბოლო დროის ერთ-ერთ ყველაზე კომფორტულ სერიალად. მაყურებელმა თავიდანვე იცის, რომ სიყვარულის ისტორია სასურველი მიმართულებით განვითარდება, რაც ზედმეტი ნერვიულობის გარეშე, დრამისა და რომანტიკისგან სიამოვნების მიღების შესაძლებლობას ტოვებს.
Amazon Prime-მა უკვე დაადასტურა, რომ სერიალი მეორე სეზონით დაბრუნდება. ახალ ეპიზოდებში წინა პლანზე სხვა წყვილები გამოვლენ. სავარაუდოდ, შემდეგი სეზონი ჰანას საუკეთესო მეგობრის, ალისა და ჰოკეის გუნდის მცველის, დინის ურთიერთობაზე იქნება.
TheDiary-ის ახალი Cover Story საქართველოს დამოუკიდებლობის დღეს ეძღვნება. მისი მთავარი გმირები მსახიობი აპოლონ კუბლაშვილი და „დელფოსის“ გამორჩეული კოლექციაა, რომელიც თითბრისგან შექმნილ მოვერცხლილ და მოოქრულ ფიგურებს აერთიანებს.
Tbilisi Newcomers 2026 საკონკურსო ნამუშევრების მიღებას იწყებს. განაცხადების მიღება 22 მაისიდან 7 ივნისის 18:00 საათამდე გაგრძელდება.
ვენეციის ბიენალეზე თედო რეხვიაშვილის პოლიტიკური მანიფესტი ვიხილეთ. ნამუშევარი „ზღვა, რომელსაც ახსოვს“ აფხაზეთის ოკუპაციის საწინააღმდეგო პროტესტია ნაურუს პავილიონში. ხელოვანმა ეს სივრცე პლატფორმად გამოიყენა, რათა მტრის მოკავშირე ქვეყნის შიგნიდან მსოფლიოსთვის საქართველოს რეალური ისტორია შეეხსენებინა.
