15 აპრილს, 19:00 საათზე, თანამედროვე ქართველი მხატვრის, მარიამ ახობაძის პერსონალური გამოფენა „სტატიკური თამაშები“ იხსნება.
მარიამ ახობაძის შემოქმედებაზე საუბრისას, პირველი, რაც თავში მოგდის, ცოცხალი ემოციისა და სტატიკურობის სინთეზია, რომელიც ტილოზე ფსიქოლოგიურ პორტრეტებად ტრანსფორმირდება. თანამედროვე ქართველი ხელოვანის ხელწერა მნახველს ადამიანის შინაგანი ბუნების ყველაზე ღრმა შრეებში ეპატიჟება.
ყველა ნამუშევარში დატოვებულია ღია კარი თუ ფანჯარა, რათა მნახველმა თავად გადაიაზროს ეს ისტორია და ემოციური განწყობა შეიქმნას, – მარიამ ახობაძე.
სწორედ ამის შესაძლებლობა გვეძლევა ახალ გამოფენაზე, რომელზე წარმოდგენილი სერიაც საინტერესო კონცეპტუალურ ხაზს მიუყვება. გამოფენის მთავარი პერსონაჟი ყველასათვის ნაცნობი, ბავშვობისდროინდელი ფერადი სპირალია. ეს სათამაშო ბავშვობის განუყოფელი ნაწილია და ყველას გვახსოვს ლეგენდაც მის შესახებ, რომ მას კიბის საფეხურებზე ხტუნვა-ხტუნვით დაშვება შეეძლო.
 |
 |
მარიამის შემოქმედებაში სპირალი ერთი ნახატიდან მეორეში ინაცვლებს და მთლიან სერიას ერთიან ნარატივად კრავს.
ეს სერია ფერებითა და ფორმებით თამაშია, რომელში მონაწილეობისკენ პასტელური, ნაცნობი და თბილი ცისარტყელას ფერები გვეპატიჟებიან.
გამოფენას The Why Not Gallery, ხელოვნების ფონდ ანაგისთან თანამშრომლობით წარმოგვიდგენს. „სტატიკური თამაშების“ ხილვა 15-30 აპრილს, ყოველდღე (ორშაბათის გარდა) 10:00-21:00 საათამდე, ზურაბ ავალიშვილის 12-ში იქნება შესაძლებელი.
მანამდე კი, წაიკითხეთ TheDiary-ს ინტერვიუ მარიამ ახობაძესთან: thediary.ge.
Amazon Prime-ის ახალი სერიალი Off Campus რომანტიკული დრამების ჟანრს ახალ სიცოცხლეს სძენს. სერიალი ელ კენედის პოპულარულ წიგნებს ეფუძნება და მაყურებელს საინტერესო თინეიჯერულ დრამაში ეპატიჟება.
TheDiary-ის ახალი Cover Story საქართველოს დამოუკიდებლობის დღეს ეძღვნება. მისი მთავარი გმირები მსახიობი აპოლონ კუბლაშვილი და „დელფოსის“ გამორჩეული კოლექციაა, რომელიც თითბრისგან შექმნილ მოვერცხლილ და მოოქრულ ფიგურებს აერთიანებს.
Tbilisi Newcomers 2026 საკონკურსო ნამუშევრების მიღებას იწყებს. განაცხადების მიღება 22 მაისიდან 7 ივნისის 18:00 საათამდე გაგრძელდება.
