SCHIAPARELLI-მ 2027 წლის გაზაფხული-ზაფხულის კოლექცია წარადგინა

დანიელ როუზბერიმ Schiaparelli-ს 2027 წლის გაზაფხული-ზაფხულის კოლექცია „Going Clear“ ლუვრის მიწისქვეშა სივრცეში წარადგინა. ამჯერად დიზაინერის მიზანი ბრენდისთვის დამახასიათებელი ფორმებისა და დეტალების ყოველდღიურ სამოსში გადატანაა.

Schiaparelli-მ ყოველდღიური სამოსის ხაზი რამდენიმე წლის წინ განავითარა, თუმცა როუზბერის თქმით, რთული იყო მისი მაღალი მოდის კოლექციებისგან გამიჯვნა და დამოუკიდებელი ხელწერის განსაზღვრა.

ამ სეზონზე მან მიმართულება შეცვალა: მაღალი მოდისთვის დამახასიათებელი ფორმები და დეტალები გაამარტივა და ყოველდღიურ სამოსს მოარგო. შედეგად, კოლექციაში Schiaparelli-ს ესთეტიკა შენარჩუნდა, სამოსი კი უფრო პრაქტიკული გახდა.

კოლექციაში შავი, თეთრი და კრემისფერი ჭარბობს, ფერადი აქცენტები კი ლურჯ, მწვანე და ვარდისფერ სამოსში გვხვდება. მკაცრი სილუეტების ნაცვლად როუზბერიმ თავისუფალი ჭრა და ასიმეტრიული დეტალები გამოიყენა.

მიუხედავად იმისა, რომ კოლექცია ყოველდღიურ გარდერობზეა გათვლილი, Schiaparelli-სთვის დამახასიათებელი გამორჩეული აქსესუარები კვლავ მნიშვნელოვან ადგილს იკავებს. ერთ-ერთი ჩანთის სახელური სპილენძის ტუჩის ფორმისაა, ტუჩისა და გასაღების ფორმის ჭრილის მოტივები კი ფეხსაცმელზე, ჩანთებსა და საყელოებზე მეორდება. სამკაულები ცხენის, დელფინის, ძაღლის, კატის, ობობისა და სხვა ცხოველების ფორმებით შეიქმნა.