Met Gala 2027-ის თემა ცნობილია: ყოველდღიური სამოსი და მისი პოეტიკა

მეტროპოლიტენის ხელოვნების მუზეუმმა 2027 წლის Met Gala-ს თემატიკა დააანონსა. გამოფენას სახელწოდებით extra-ORDINARY: Fashion and the Poetics of the Everyday კოსტიუმების ინსტიტუტის კურატორი ენდრიუ ბოლტონი უხელმძღვანელებს. პროექტი იკვლევს, როგორ გარდაქმნიან დიზაინერები ყოველდღიურ სამოსსა და ჩვეულებრივ მასალებს ხელოვნების ნიმუშებად.

გამოფენაზე წარმოდგენილი იქნება ახლებურად გააზრებული მაისურები, ჯინსები და ტრენჩები, ასევე Comme des Garçons-ის 1992 წლის კოლექციის ქაღალდის კაბა. მათ გვერდით ვიხილავთ Maison Margiela-სა და სხვა დიზაინერების ნამუშევრებს, რომლებიც ნაპოვნი საგნებისა და უჩვეულო მასალებისგან არის შექმნილი.

კონცეფცია ორ მიმართულებას აერთიანებს: გამოფენა აჩვენებს, როგორ იქცევა ყოველდღიური სამოსი მაღალი მოდის ნიმუშად და როგორ ქმნიან დიზაინერები ქაღალდის, ალუმინისა და პლასტმასისგან ხელოვნების ნიმუშებს, რომელთა ტარებაც შესაძლებელია.

პროექტმა ჩაანაცვლა ჯონ გალიანოსადმი მიძღვნილი გამოფენა, რომელიც 2027 წელს უნდა გამართულიყო, თუმცა მოგვიანებით გაუქმდა. ენდრიუ ბოლტონის თქმით, მას წინასწარ მომზადებული ალტერნატიული გეგმა არ ჰქონია და არც ახალი პროექტის შექმნა სურდა მხოლოდ მუზეუმის საგამოფენო პროგრამაში დარჩენილი ადგილის შესავსებად.

ახალ კონცეფციას საფუძვლად დაედო კოსტიუმების ინსტიტუტის 2026 წლის გამოფენა „Costume Art“, რომლის მთავარი თემა სამოსით შემოსილი სხეული იყო. პროექტზე მუშაობისას ბოლტონი დაინტერესდა, როგორ აღვიქვამთ ტანსაცმელს ყოველდღიურ ცხოვრებაში შეხების, მოძრაობისა და ჩვევების მიხედვით. გამოფენის მომზადებაში მას სტეფანი კრამერი და ემილი მუშაბენი ეხმარებოდნენ.

2027 წლის Met Gala 3 მაისს გაიმართება.