შეფ ენცო ნერის საქველმოქმედო ინიციატივა ძეგვის თავშესაფრის მხარდასაჭერად

იტალიელი შეფ-მზარეულის, ენცო ნერის კულინარიული მოგზაურობა 20 წელზე მეტს ითვლის. რამდენიმე წელია, რაც მან თბილისი თავის სახლად აქცია და მიზნად დაისახა, ქართველებისთვის ავთენტური იტალიური სამზარეულო გაეცნო. ამ მისიის პარალელურად კი, ენზო ნერიმ გადაწყვიტა თავისი ენერგია კიდევ უფრო მნიშვნელოვანი საქმისკენ – ქველმოქმედებისკენ მიემართა.

წლების განმავლობაში ვეძებდი ორგანიზაციას, რომლის მეშვეობითაც ბავშვებს დავეხმარებოდი. შემდეგ ჩემი ძვირფასი მეგობარი ნინო გაგუა გავიცანი, რომელმაც ორგანიზაციასთან „საქართველოს ამერიკელი მეგობრები“ დამაკავშირა და სწორედ ასე დავაარსეთ ძეგვის თავშესაფრის საქველმოქმედო ღონისძიება, – ენცო ნერი.

ეს ამბავი 2019 წელს დაიწყო. ნინო გაგუასთან და „საქართველოს ამერიკელ მეგობრებთან“ თანამშრომლობით, შეფ ენცომ საფუძველი ჩაუყარა ყოველწლიურ ტრადიციას. წლევანდელი ღონისძიება განსაკუთრებით მნიშვნელოვანი ეტაპია, რადგან Andrea Cilento-სა და იტალიის ელჩის, Massimiliano D'Antuono-ს დახმარებით, მას ოფიციალურად იტალიის საელჩო უჭერს მხარს.

შეფ ენცო ნერის კავშირი საქართველოსთან ჯერ კიდევ 2015 წელს დაიწყო, კახეთში, „შატო მერეში“ გამართული მასტერკლასით. ეს ჩვეულებრივი საქმიანი ვიზიტი სწრაფად გადაიზარდა საქართველოსადმი დიდ სიყვარულში. მოგვიანებით, ნიუ-იორკში მუშაობისას, შეფმა ქართული კულინარიის პატივსაცემად ორიგინალური „შოკოლადის ხინკალი“ – ხინკლის ფორმის დესერტი შექმნა.

როდესაც შეფ ენცომ თბილისში დასახლება გადაწყვიტა, აქტიურად ჩაერთო ადგილობრივ კულინარიულ ცხოვრებაში. მან წლები დაუთმო ქართველი მომხმარებლის გემოვნების შესწავლას და რამდენიმე წარმატებული პროექტი, მათ შორის La Boheme და ASADO Steakhouse წამოიწყო. სულ ცოტა ხნის წინ კი, დედაქალაქში ავთენტური იტალიური გემოების დეფიციტის შესავსებად, ნიკოლო რიჩარდისთან პარტნიორობით, ვერაზე ახალი რესტორანი Vera Italiana გახსნა.

ხმაურიანი და ქაოსური სამზარეულოს მიღმა, ენცოს ყოველთვის სურდა, მხარში დასდგომოდა მათ, ვისაც ეს ყველაზე მეტად სჭირდებოდა. ძეგვის თავშესაფრისთვის გამართული საქველმოქმედო ღონისძიებები მას საშუალებას აძლევს, საქართველოში სიკეთის ისტორია დაწეროს.

ბევრ ქვეყანაში მიმუშავია, მაგრამ ქართველი ხალხისგან განსაკუთრებულ სითბოსა და სიყვარულს ვგრძნობ. მინდოდა, ეს სიყვარული მათთვის რაიმე სახით დამებრუნებინა, – ენცო ნერი.

ძეგვის თავშესაფარი, რომელსაც ნანა გოგოჭური ხელმძღვანელობს, ასამდე ბენეფიციარს, მათ შორის მზრუნველობას მოკლებულ ბავშვებსა და უსახლკარო ადამიანებს მასპინძლობს. შეფ ენცოსა და მისი გუნდის მთავარი მიზანია, ძეგვის თავშესაფრის საჭიროებები ფართო საზოგადოებას გააცნონ, ერთ ჭერქვეშ გააერთიანონ მაცხოვრებლები, მოხალისეები, მეგობრები და საფუძველი ჩაუყარონ სამომავლო პარტნიორობას, რათა თავშესაფარმა დახმარება მთელი წლის განმავლობაში, უწყვეტად მიიღოს.

TheDiary-ს მკითხველებო, თქვენც შეგიძლიათ შეუერთდეთ საქველმოქმედო ლანჩს, 21 ივნისს, 14:00 საათზე, ძეგვის თავშესაფარში.

ეს ტრადიცია უკვე ასრულებს დიდ საქმეს, ახლა კი მას მხოლოდ ჩვენი მხარდაჭერა სჭირდება, რათა დახმარების ხელი მეტ ადამიანს მისწვდეს.