ელენე გლურჯიძე: პირველი ქართველი გოგო, რომელიც MMA-ში ევროპის ჩემპიონი გახდა

ქართულ შერეულ ორთაბრძოლებში (MMA) ახალი სახელი გამოჩნდა. 16 წლის ელენე გლურჯიძემ IMMAF-ის 2026 წლის ევროპის ჩემპიონატზე ოქროს მედალი მოიპოვა და პირველი ქართველი გოგონა გახდა, რომელმაც ამ ორგანიზაციის ეგიდით ევროპის ჩემპიონობა შეძლო.

ჩემპიონატში, რომელიც ქალაქ ბელგრადში მიმდინარეობს, ელენემ აზერბაიჯანელი გოგონა, ფატიმა გარიბოვა დაამარცხა. ელენე MMA-ში სულ რაღაც ერთი წლის წინ გამოჩნდა. მიუხედავად ასეთი მცირე დროისა, ის უკვე გახლავთ გრეპლინგის საქართველოს ჩემპიონი, IMMAF 2025-ის ბრინჯაოს პრიზიორი, 2026 წლის საქართველოს ჩემპიონი MMA-ში და უკვე IMMAF-ის 2026 წლის ევროპის ჩემპიონი (Atomweight კატეგორია).

თავიდან ვერ ვიჯერებდი, ეს ყველაფერი ცოტა სიურრეალურად მეჩვენებოდა. არასდროს მეგონა, რომ ამ სპორტში ასე ღრმად ჩავერთვებოდი, თუმცა ახლა ნელ-ნელა ვაცნობიერებ მომხდარს და ეს საოცარი გრძნობაა, – ელენე.

მიუხედავად იმისა, რომ საქართველომ მამაკაცთა MMA-ში, ილია თოფურიასა და მერაბ დვალიშვილის ჩემპიონობის წყალობით, უკვე დაიმკვიდრა სახელი, ქალთა სპორტში აქტივობა ისტორიულად დაბალი იყო. ელენეს ოქროს მედალი კი საქართველოს MMA-ს ფედერაციისთვის გარდამტეხი მოვლენაა.

ჩემი ოცნება იყო, რომ ეროვნული ჰიმნი გაჟღერებულიყო. როდესაც სიმღერა დავიწყე, ძალიან ვღელავდი. მიხარია, რომ ეს შევძელი, – ელენე.

ქართულ სპორტში ქალთა ჩართულობა სულ უფრო იზრდება, მათ შორის ისეთ რთულ სახეობაში, როგორიც შერეული ორთაბრძოლებია. ელენეს მიერ მოპოვებული ეს ოქრო კი მისი საერთაშორისო კარიერისთვის მხოლოდ დასაწყისია.