„ემი“ 2026: „ქვრივის ყურემ“ 14 ჯილდო მოიპოვა

14 სექტემბერს ლოს-ანჯელესში, „პიკოკის“ თეატრში, „ემის“ დაჯილდოების 78-ე ცერემონია გაიმართა. წლევანდელ დაჯილდოებაზე 2025 წლის 1 ივნისიდან 2026 წლის 31 მაისის ჩათვლით გამოსული საუკეთესო სატელევიზიო პროექტები გამოავლინეს.

ცერემონიას პირველად გაუძღვა სერიალის „კანონი და წესრიგი: სპეციალური კორპუსი“ (Law & Order: Special Victims Unit) ვარსკვლავი მარისკა ჰარგიტაი. ის ბოლო 15 წლის განმავლობაში პირველი ქალი გახდა, რომელმაც დაჯილდოებას დამოუკიდებლად უმასპინძლა.

წელს ყველაზე მეტი ჯილდო კომედიურმა სერიალმა „ქვრივის ყურე“ (Widow’s Bay) მოიპოვა. პროექტმა სულ 14 „ემი“ მიიღო: რვა Creative Arts Emmy-ის დაჯილდოებაზე და ექვსი მთავარ ცერემონიაზე, მათ შორის საუკეთესო კომედიური სერიალის ჯილდო. ამ შედეგით მან კომედიური სერიალის მიერ ერთ წელიწადში მოპოვებული „ემის“ ჯილდოების რეკორდი დაამყარა.

ამავე სერიალში მამაკაცის მთავარი როლის საუკეთესო შესრულებისთვის მეთიუ რისი დაჯილდოვდა, ხოლო სტივენ რუტმა და კეიტ ო’ფლინმა ჯილდოები მეორეხარისხოვანი როლების შესრულებისთვის მიიღეს. „ემი“ მოიპოვა სერიალის ოპერატორის ნამუშევარმა და ორიგინალურმა მუსიკამაც.

მეთიუ რისმა მეორე სამსახიობო ჯილდო მინისერიალში, ანთოლოგიურ სერიალში ან სატელევიზიო ფილმში მამაკაცის მთავარი როლის საუკეთესო შესრულებისთვის მიიღო. მსახიობი მინისერიალში „მხეცი ჩემში“ (The Beast in Me) უძრავი ქონების მაგნატის, ნაილ ჯარვისის როლის შესრულებისთვის დაჯილდოვდა.

საუკეთესო დრამატული სერიალის ჯილდო კი „პიტის საავადმყოფომ“ (The Pitt) ზედიზედ მეორედ მოიპოვა.