სულ ცოტა დრო რჩება 2025 წლის Met Gala-მდე — მოდის ყველაზე მნიშვნელოვან საღამომდე, რომელიც მსოფლიოს გამორჩეულ ვარსკვლავებსა და დიზაინერებს აერთიანებს. 5 მაისს, ნიუ-იორკის მეტროპოლიტენის ხელოვნების მუზეუმის კიბეები კვლავ გადაიქცევა ფანტაზიების არენად, სადაც ყოველი ნაბიჯი, ყოველი ლუქი და დეტალი კულტურული მანიფესტია. ამიტომ, წინ ხელოვნების, ისტორიისა და მოდის უნიკალური სინთეზი გველის, რომელიც მსოფლიოს ყურადღებას მიიპყრობს.
2025 წლის გალას თემაა "Superfine: Tailoring Black Style", რომლის ინსპირაციაც მონიკა მილერის წიგნი Slaves to Fashion: Black Dandyism and the Styling of Black Diasporic Identity გახდა. მილერი წიგნში იკვლევს შავკანიანთა მოდის ისტორიას მე-18 საუკუნიდან დღემდე, განსაკუთრებულ აქცენტს აკეთებს დენდიზმზე – დახვეწილ მამაკაცურ სტილსა და ინდივიდუალურ თვითგამოხატვაზე.
დრესკოდიც შესაბამისი იქნება. სტუმრებმა, თავიანთ დიზაინერებთან ერთად, Tailored for You კონცეფციით უნდა შექმნან ლუქი და საღამოზე ინდივიდუალურობისა და საერთო თემის ირგვლივ შექმნილი, ჰარმონიული დიზაინი შემოგვთავაზონ. ალბათ ვიხილავთ კლასიკური კოსტიუმების თანამედროვე ინტერპრეტაციებს, მამაკაცური სილუეტების ინოვაციურ ტრანსფორმაციებსა თუ შავკანიანთა მოდის ისტორიული და თანამედროვე ესთეტიკის სინთეზს.
Met Gala-ს უნიკალურობას ექსკლუზიური ხასიათი სძენს. გალაზე მოხვედრა მხოლოდ მოსაწვევითაა შესაძლებელი, ბილეთის ფასი კი 75,000 დოლარს აღწევს. ხოლო, გალას ოფიციალური ფუნქცია კოსტიუმების მუზეუმის საქველმოქმედო ფონდისთვის თანხის შეგროვებაა. 2024 წელს შემოწირულებების რაოდენობამ 26 მილიონ დოლარს გადააჭარბა.
|
|
ღონისძიებას იდუმალებას ანიჭებს ის ფაქტიც, რომ საღამოზე მობილურების გამოყენება აკრძალულია. ჩვენ მხოლოდ ის ვიცით, რომ სტუმრებს შეფ-მზარეულის, კვამე ონვუაჩის უნიკალური მენიუ ელოდებათ. ასევე, მათ ექნებათ შესაძლებლობა, პირველებმა დაათვალიერონ გამოფენა Superfine: Tailoring Black Style, სადაც წარმოდგენილი იქნება შავკანიანთა მოდის ისტორიული კოსტიუმები, თანამედროვე დიზაინერების შედევრები თუ ფოტოგრაფიის ნამუშევრები.
საღამოს მასპინძლები იქნებიან Vogue-ის რედაქტორი ანა ვინტური, მსახიობი და მუსიკოსი კოლმენ დომინგო, ფორმულა 1-ის ვარსკვლავი ლუის ჰამილტონი, რეპერი A$AP Rocky, მუსიკოსი და დიზაინერი ფარელ უილიამსი. ხოლო საპატიო თავმჯდომარის როლს NBA-ის სუპერვარსკვლავი ლებრონ ჯეიმსი მოირგებს.
წითელ ხალიჩაზე, როგორც ყოველთვის, არაერთი A-lister-ი გამოჩნდება. საინტერესოა, ვიხილავთ თუ არა სოციალური ქსელების გამორჩეულ კრეატორს, Wisdom Kaye-ს, რომლის უნიკალურ ლუქებში თანამედროვე Dandy-ს სტილი ზუსტად იკვეთება.
ვარსკვლავები, როგორც წესი, მუზეუმის მახლობლად მდებარე სასტუმროებში ემზადებიან ხოლმე, მათ შორისაა The Mark Hotel, რომლის გარშემოც პაპარაცები ყოველთვის ჩასაფრებულები არიან. თუ ამ დროს ნიუ-იორკში იქნებით, შეიძლება რომელიმე ვარსკვლავის ლუქს ახლოდანაც შეავლოთ თვალი.
ჩვენც, თქვენთან ერთად, ველით მოდის ყველაზე მნიშვნელოვან ღამეს, რომელიც ნამდვილად ატარებს უდიდეს კულტურულ დატვირთვას და შავკანიანთა საზოგადოებისთვის განსაკუთრებული მოვლენაა. Met Gala 2025 მოდის ისტორიასთან ერთად, მსოფლიოს კოლექტიურ მეხსიერებაშიც დაიკავებს საპატიო ადგილს.
იტალიური ფილერების ხაზი Stylema იმ იშვიათ პროდუქტებს შორისაა, რომლებიც საქართველოში MDR სერტიფიკატით გამოიყენება. იგი სრულად აკმაყოფილებს ევროკავშირის უსაფრთხოების და ხარისხის უმაღლეს სტანდარტებს. Stylema-ს ექსკლუზიური დისტრიბუტორია კომპანია „სკინოთეკა“.
პედრო პასკალი სტილის ახალ სიმბოლოდ იქცა — თამამი არჩევანითა და უნიკალური ვიზუალური ხელწერით მსახიობმა თანამედროვე მოდაში საკუთარი სახელი დაამკვიდრა. მსოფლიოს ახალი Fashion Daddy ჰყავს!
შეიხა მოზა არაბული სამყაროს სტილისა და გავლენის სიმბოლოა. ნახეთ, როგორ აქცევს იგი მაღალი მოდის შედევრებს კულტურულ გზავნილებად და რატომ არის მისი ყოველი გამოჩენა სოციალური და პოლიტიკური განაცხადი.
