ზენდაიას მითოლოგიური ლუქი

ზენდაიას სტილისტი ლო როუჩი თითქოს მოდის ღმერთებს გაურიგდა. სხვანაირად რთულია აიხსნას თითოეული ლუქი, რომელსაც ის ზენდაიასთვის ქმნის.

მსოფლიოში „ოდისეას“ პრეს-ტური მიმდინარეობს და მოდის მიმდევრებისთვის ფილმის პარალელურად მთავარი მოვლენა ზენდაიას წითელი ხალიჩის ლუქებია.

ჩვენი ყურადღება ჯერ ლონდონის პრემიერამ მიიპყრო, სადაც მსახიობი Schiaparelli-ის კუტიურ კაბით გამოჩნდა. დენიელ როუზბერის უახლესი კოლექციის კაბა პოდიუმიდან პირდაპირ პრემიერაზე მიუტანეს მსახიობს.

ვისაც წუხელ არ გეძინათ, უკვე ნახავდით; ჩვენ კი ცოტა ხნის წინ გავიღვიძეთ და ინსტაგრამი, პირდაპირი მნიშვნელობით, ზენდაიას მორიგი გამოჩენით დაგვხვდა „აფეთქებული“. ამჯერად მსახიობი მითიურ ფრინველს ჰგავდა.

პარიზის პრემიერაზე ზენდაიამ Givenchy Haute Couture-ის 1997 წლის გაზაფხულის კოლექციის ლუქი მოირგო. კაბა ალექსანდერ მაკქუინის პირველი კოლექციიდანაა, რომელიც მან Givenchy-ისთვის შექმნა. კოლექციას „The Search for the Golden Fleece“ ერქვა და ბერძნული მითოლოგიით, კერძოდ, იასონისა და არგონავტების ამბით იყო შთაგონებული. 

კაბა თავისთავად შესანიშნავია, მაგრამ ამ ლუქის მთავარი აქცენტი ფილიპ ტრეისის ოქროს თავსაბურავია, რომელიც გვიქმნის ილუზიას, თითოქს ზენდაია ეს ესაა მითოლოგიური სამყაროდან გადმოვიდა.