ბოდბე: თანამედროვე სასტუმრო კახეთის გულში

სასტუმრო „ბოდბე“, რომელსაც კავკასიონისა და ალაზნის ველის პანორამული ხედები გამოარჩევს, ისტორიული სივრცის თანამედროვე ინტერპრეტაციას გვთავაზობს. აქ შეგიძლიათ შინაგან რიტმს დაუბრუნდეთ, განიტვირთოთ და მზიანი დღეები მშვიდ გარემოში გაატაროთ.

სასტუმროს ინტერიერი და ექსტერიერი საერთო კონცეფციას მიჰყვება. ინტერიერი ნათელი და თბილია, დეტალები კი ისეთი სიზუსტით არის შერჩეული, რომ სივრცეში ფუნქციურობასა და არქიტექტურულ ელეგანტურობას შორის ბუნებრივი ბალანსია მიღწეული.

სასტუმროში ორი რესტორანი ფუნქციონირებს. Aura ქართულ ტრადიციულ სამზარეულოს ემსახურება, ხოლო Lagaza მათთვისაა, ვისაც კავკასიონის ხედის ფონზე ევროპული კერძების დაგემოვნება ურჩევნია. „ბოდბეს“ დილა გემრიელი საუზმით იწყება. მსუბუქი ნამცხვრები, ახლადგამომხვარი პური და არომატული ყავა მთელი დღისთვის სასიამოვნო განწყობას ქმნის.

აქვე დაგხვდებათ Tea Lounge, სადაც სხვადასხვა სახეობის ჩაის შეგიძლიათ დააგემოვნოთ. ამ სივრცეში დრო თითქოს უფრო ნელა მიედინება. Wine Bar-ი კი ქართულ და უცხოურ ღვინოებს ერთ სივრცეში აერთიანებს და შესაძლებლობას გაძლევთ დაგემოვნოთ როგორც ნაცნობი, ისე ახალი გემოები.

სასტუმროს ტერასიდან სიღნაღის ხედი იშლება - ქალაქის, რომლის არქიტექტურა „ბოდბეს“ გამოცდილების ბოლო აკორდია. რამდენიმე წუთის სავალზეა მოკირწყლული ქუჩები, რომლებიც დაუვიწყარ ხედებსა და ტრადიციული არქიტექტურის ნიმუშებამდე მიგიყვანთ.

სასტუმროში ბევრი სხვადასხვა აქტივობაა. დაგხვდებათ პადელის კორტები, სპა, შიდა და გარე აუზი, ბიბლიოთეკა და ბარიც, რაც საშუალებას გაძლევთ დღე ზუსტად ისე გაატაროთ, როგორც თავად გსურთ. რაც არ უნდა აირჩიოთ, დაგრჩებათ ისეთი გამოცდილებები, რომლებიც აქ დაბრუნების სურვილს გაგიჩენთ.